Styre, råd og utval i Askvoll kommune

Ansvarsområde

Kommunestyret er det øvste, styrande organ i kommunen. Kommunestyret handlar på vegne av kommunen i alle saker som ikkje er delegert til andre kommunale organ. Kommunestyret fører tilsyn med kommunen si samla verksemd, vedtek budsjett og ønonomiplan, vel medlemmer til formannskap, utval, styrer og råd. 
 

Samansetting

Askvoll kommunestyre består av 21 folkevalde politikarar, med ordføraren som leiar. 

Det er 6 politiske parti som er representert i Askvoll kommunestyre i perioden 2023-2027. Du kan ta kontakt med gruppeleiarane for å diskutere politiske saker. 

Alle politikarane med unnatak av ordførar og kontrollutvalet sitt medlem, sitt i ein av kommunestyret sine komitéar.  Mange av sakane som skal til kommunestyret, vert førebudd i ein av komitéane. Komitéen kan ikkje fatte endeleg vedtak i saker, men fremjar si eiga tilråding til kommunestyret.
 

Møteverksemd

Ordførar kallar inn til møte. Kommunestyremøta er opne for publikum. 

• Møtekalender for kommunestyremøta i Askvoll kommune

Møteplanen inneheld òg kontaktinformasjon til folkevalde i Askvoll kommune. 

Formannskapet er det nest øvste politiske organ i kommunen. Det består av 7 medlemmer med varamedlemmer, som alle er valt blant kommunestyret sine medlemmer for 4 år, jf. kommunelova § 8.  

Formannskapet sine funksjonar er fastsett i kommunelova, særlover og i reglement for delegasjon av avgjersmynde til politiske organ og administrasjonen. Dømer på formannskapet sine oppgåvene er handsaming av framlegg til økonomiplan, årsbudsjett og skattevedtak jf. kommunelova § 8 (3), vedtaksmynde som fastutval for plansaker, vedtaksmynde for valstyre, byggjenemnd og klagenemnd etter forvaltningslova § 28, 2.ledd, m.m.

Her finn du oversikt over medlemmar, møteplan og saker

I 2011 innførte Askvoll kommune komitémodellen som politisk styringsmodell. Komitémodellen inneber at kommunestyret er delt inn i komitéar med fast fagområde. Alle politikarane i kommunestyret (med unnatak av ordførar og kontrollutvalet sitt medlem) vert valt inn i komitéane.
Saker som skal til handsaming i kommunestyret, vert fyrst utgreidd av administrasjonen. Ordføraren fordeler sakene til komitéane som førebur saka. Komitéane har ikkje avgjerdsmynde i saker, men skal leggje fram ei tilråding til vedtak som så vert handsama i kommunestyret i plenum. Handsaminga i komitéane skjer i forkant av kommunestyremøtet same dag.  
 

Komité for oppvekst og kultur
Komitéen førebur og legg fram tilråding i saker som gjeld undervisning, barnehagar, barne- og ungdomsarbeid, kyrkjesektor, kultur & idrett og fagplanar innanfor desse områda.

Her finn du medlemmar, møteplan og saker for komite for oppvekst og kultur
 

Komité for helse og omsorg 
Komitéen førebur og legg fram tilråding i saker som gjeld område som kjem under helse- og sosiallovgjevinga når det gjeld pleie- og omsorgsteneste for eldre / funksjonshemma og tiltak for andre med ulike fysiske, psykiske og sosiale vansker, kommunale oppgåver i NAV-kontoret, helsevern og miljøretta helsevern, lege og fysioterapitenester, den interkommunale barnevertenesta, sals- og skjenkeløyve / inndraging, fagplanar innanfor desse områda, m.m.

Her finn du medlemmar, møteplan og saker for komite for helse og omsorg
 

Komité for næring, miljø og teknikk
Komitéen førebur og legg fram tilråding i alle overordna plansaker, større plansaker som t.d. kommuneplan og kommunedelplan for Atløysamband, landbruksverksemd, område for veg, vatn, avløp, renovasjon, brann og feievesen, næringslivsspørsmål, miljøspørsmål, sakar knytt til hamnespørsmål, fagplanar innanfor desse områda, m.m.

Her finn du medlemmar, møteplan og saker for komite for næring, miljø og teknikk

Administrasjonsutvalet er eit partssamansett utval med 9 medlemmar oppretta med heimel i kommunelova § 5-11. Arbeidsgjevarsida er representert ved dei 7 medlemmane i formannskapet, og dei sit i fire år i samsvar med valperioden. Dei to tilsette sine representantar (med personleg vara) vert valt av arbeidstakarorganisasjonane, og er valt for to år om gangen.

Utvalet skal handsame saker som gjeld tilhøvet mellom kommunen som arbeidsgjevar og dei tilsette.

Kontrollutvalet har på vegner av kommunestyret det løpande tilsynet med forvaltninga i kommunen jf. kommunelova § 77 1.ledd. Kommunestyret skal sjølv velje eit kontrollutval.
 

SEKOM-sekretariat er saksbehandlande organ for Askvoll kontrollutval.
 

Her finn du medlemmar, møteplan og saker

Fellesrådet er eit kommunalt råd som kan gje råd i og uttale seg om saker som vedrører dei eldre i og personar med nedsett funksjonsevne i kommunen.

Fellesrådet skal veljast av kommunestyret for valperioden. Rådet har 5 medlemmar med personlege varmedlemmar. To medlemmar av rådet skal veljast etter forslag frå pensjonistane sin interesseorganisasjon, og to medlemmar skal veljast etter forslag frå organisasjonane til menneske med funksjonsnedsetjing. Eitt medlem av rådet skal veljast blant kommunestyrerepresentantane.

Rådmannen peikar ut sekretariat for fellesrådet som kallar inn til møte etter avtalen med leiaren. Sekretariatet fører møtebok etter kommunen sine reglar for møtebøker i folkevalde organ.

Sekretær for rådet er Vlada Fristad. E-post: vladyslava.fristad@askvoll.kommune.no

Meir informasjon

• Brosjyre for Råd for eldre og menneske med nedsett funksjonsevne i Askvoll kommune 2024-2028 (PDF, 264 kB)
• Rettleiar for råd for personar med funksjonsnedsetjing (Bufdir) 
• Rettleiar for eldreråd
• Her finn du medlemmar, møteplan og saker for råd for eldre og menneske med nedsett funksjonsevne

Funksjonen som barnerepresentant er heimla i plan- og bygningslova § 3-3: "kommunestyret skal sørge for å etablere en særskilt ordning for å ivareta barn og unges interesser i planleggingen".

Ordninga med barnerepresentant er òg ein del av den norske tilrettelegginga for å oppfylle forpliktingane i FN sin barnekonvensjonen, som vart ratifisert i 1991.

Barnerepresentanten har møte- og talerett og rett til å stille forslag overfor kommunen sitt planutval. Barnerepresentanten har rett til å få gjort protokollmerknader, men har ikkje høve til å klage over vedtak. Barnerepresentanten skal gjevast innsiktsmoglegheit og uttalerett i dei deler av planlegginga som blir behandla av det faste utvalet for plansaker, det vil seie (i hovudtrekk):

• utbyggingsplanar
• reguleringsplanar
• kommuneplanen sin arealdel
• kommuneplanen (inkludert økonomiplan/årsbudsjett)
• kommunedelplanar (trafikktryggleik - idrett og friluftsliv)

For å sikre deltaking skal barnerepresentanten få tilsend sakspapir i god tid før møta og helst tidleg i oppstartsfasen av ein planprosess. Barnerepresentanten skal sjå til at kommunen gjer jobben sin i samsvar med rikspolitiske retningslinjer for å styrke barn og unge sine interesser i planlegginga (RPR) og yte til at barn og unge kjenner rettane sine på ein slik måte at dei sjølv kan kome med innspel i planprosessar etter plan- og bygningslova.

Kommunestyret sin barnerepresentant i perioden 2019 - 2023 er Anne Kari Iversen. E-post: Anne.Kari.Iversen@Askvoll.kommune.no.

Askvoll kommune har sitt eige ungdomsråd som er ungdommen sitt øvste talerøyr, og arbeider for å fremje interessane og meiningane til ungdommen i kommunen vår. Medlemmane er mellom 13 og 19 år.

Ungdomsrådet har rett til å uttale seg i alle saker som gjeld ungdom i kommunen. Det kan vere mange ulike saker, til dømes:

• kultur- og fritidstilbod
• skulesaker
• helsetilbod
• samferdsle og kollektivtilbod
• miljøsaker
• kommunen sitt årsbudsjett og økonomiplan
• arealplanlegging
• kommuneplanar 
   

Kontaktperson i kommunen for ungdomsrådet er Helene Norstrand. E-post: helene.norstrand@askvoll.kommune.no
 

Her finn du medlemmar, møteplan og saker for ungdomsrådet

Tilsetjingsutvalet skal handsame alle tilsetjingssaker med unnatak av dei sakene som ligg til kommunestyret å avgjere, eller er delegert til rådmannen. Utvalet er samansett av rådmannen eller den rådmannen gjev fullmakt til (t.d. ass. rådmann eller kommunalsjef), etatleiar eller mellomleiar frå aktuell etat, og ein tillitsvald.

I samsvar med § 2 i reglement for dei politiske styringsorgana i Askvoll kommune skal det veljast ei valnemnd som skal ha like mange medlemmar som det er parti i kommunestyret med eitt medlem og eitt varamedlem frå kvart parti.

Valstyret har ansvar for førebuing og gjennomføring av kommunestyre- og fylkestingsval, og stortings- og sametingsval i Askvoll kommune.

Det er kommunestyret som vel valstyret. Kommunestyret gjorde i sak 026/13 vedtak om at formannskapet er valstyret, med ordførar og varaordførar som høvesvis leiar og nestleiar.

Her finn du medlemmar, møteplan og saker

Askvoll sogenemnd vart skipa i 1946. Sogenemnda er eit kommunalt organ utpeika av kommunestyret, og nemnda gjev m.a. årleg ut Sogehefte for Askvoll.

Arbeidsmiljøutvalet (AMU) er eit krav etter Arbeidsmiljølova. AMU skal m.a. ta del i planlegging og fylgje med i tilhøva for dei tilsette innan helse, miljø og sikkerheit (HMS). Meir informasjon om arbeidsmiljøutvalet finn du her.

Meir utfyllande info i Arbeidsmiljøloven kap. 7

Styret for næringsfondssaker utgjer styret for Askvoll kommune sitt næringsfond. Styret er personidentisk med medlemmane i Komité for næring, miljø og teknikk med delegert fullmakt til å handsame og vedta alle typar søknadar om tilskot, som skildra i vedtekter for kommunalt næringsfond for Askvoll kommune. (PDF, 118 kB)

Uavhengig av søknadsbeløp skal og alle ukurante søknadar handsamast av fondsstyret.
 

Her finn du medlemmar, møteplan og saker for styre for næringsfondsaker

Her finn du meir informasjon om kommunalt næringsfond

Sakkunnig nemnd eigedomsskatt

§ 1-1 I medhald av eigedomsskattelova § 8 A-3 (4) vel kommunestyret ei sakkunnig nemnd til å verdsetje eigedomar i Askvoll kommune på bakgrunn av forslag frå tilsette synfaringsmenn.

Klagenemnd i eigedomsskattesaker

I medhald av eigedomsskattelova § 20 har kommunestyre valt ei eige klagenemnd i eigedomsskattesaker.

Folket sin eigen domstol

Alle kommunar har eit forliksråd. Det består av 3 valde lekdommarar og like mange varamedlemmar som kommunestyret har valt for fire år av gangen.

Forliksrådet kan hjelpe deg med å løyse konfliktar eller tvistar gjennom mekling. I nokre tilfelle kan forliksråd avseie ein dom for kravet ditt.

Askvoll kommune er saman med Fjaler, Hyllestad og Høyanger del av det felles forliksrådet "Ytre Sogn og Sunnfjord forliksråd".
 

Kontakte Forliksråd

I saker som angår forliksklager og saker i forliksrådet, skal du kontakte ditt lokale forliksråd/namsmannen ved politiet. Der vil du få gratis råd og rettleiing, og svar på eventuelle spørsmål.  

For forliksråd for Askvoll kommune, ta kontakt med:

Fjaler politistasjon

Telefon: 57 73 99 50

E-post: post.vest@politiet.no

Besøksadresse: Dalstunet 16, 6963 Dale i Sunnfjord

Sjå opningstider for Fjaler politistasjon på politiet.no

Eller Politiet på telefon 02800.

Meir informasjon

Informasjon om forliksrådet eller skjema og liknande finn du på politiet.no

Sjå òg www.forliksraadet.no.

Askvoll kommune deltar i ulike interkommunale samarbeid og er aksjonær i diverse verksemder:

• HAFS-regionråd
   
• SYS IKT
   
• Fjordane Friluftsråd
   
• Legevakt SYS IKL
   
• Folkehelseavdelinga
   
• HAFS Barnevernteneste
   
• Sunnfjord Miljøverk IKS
   
• Alden Hamneområde
   
• Visit Fjordkysten
   
• Alarmsentralen Sogn og Fjordane 
   
• Lutelandet Utvikling
   
• Vestland Revisjon Kommunalt oppgåvefellesskap
   
• SEKOM-sekretariat 
   
• Firda Billag AS 
   
• Kystvegen Måløy-Florø
   
• SunnLab AS
   
• Sogn og Fjordane Energi SFE