Olsetvikane næringspark
Olsetvikane næringspark ligg på sørsida av Askvika, og strekk seg frå Olsetneset i vest mot Nesberget i aust. Fleire bedrifter har etablert sine verksemder her, mellom andre Olset Entreprenør AS, Sunnfjord Miljøverk IKS, Sogn og Fjordane Energi, og Sub Aqua Tech AS. I nordaust er det etablert ei småbåthamn. Frå området til fylkesveg 608 er det omlag 1,3 km. Til Askvoll sentrum er det omlag 3 km. I sentrumsområdet ligg alle kommunale kontor og barnehage, skular og kultur- og idrettsbygg. Sentrum har elles fleire servicefunksjonar som hotell, fysioterapi og tannlege, og ulike kontor- /næringsverksemder med post i butikk, rekneskapstenester, vinmonopol, og diverse andre butikkar.
Området ligg i dag på enden av kommunal veg, med liten trafikk. Ved utbygging av Atløysambandet vil den daglege trafikken gjennom området auke. Då vil trafikken til/frå Atløy passere gjennom området og skape auka aktivitet og attraktivitet for nyetablering. Heile industriområdet i Olsetvikane ligg tett ved den indre leia langs kysten. Med forventa nasjonal vekst i marine og maritime næringar, og stadig betre kommunikasjonar mot midtre og indre delar av fylket, kan det på lenger sikt forventast ein auka marknadsverdi som følgje av området si lokalisering i eit knutepunkt mellom sjø og land.
Ledig areal i Olsetvikane:
- 25,5 dekar i vest (tomt A, B og D) er opparbeidd og byggjeklart. 17 daa har grense til sjø, og 8,5 daa er utan.
- 32 dekar i vest (tomt C) med samanhengande areal (råtomt). Det meste arealet grensar til sjø og det er regulert for kai (sjå utsnitt frå reuleringsplan).
- 40 dekar i aust ( tomt E, F og G) - tre samanhengande råtomter.
Arealet i vest (tomt A, B og D) ligg ved enden av kommunal veg og er planert av utskotne massar, med strandline i vest og i nord. Her blir det høve for å kople seg til VA-anlegg og straumnett. Ny trafo med høve for tilkopling til straumnettet, blir etablert like nord for kommunal veg. Ubebygde areal (tomt C,) består i hovudsak av kupert nordvendt terreng, med jorddekt fastmark, noko myr, og naturleg tilvekst av kratt og lauvtre.
På kvar tomt skal det avsettast 1 oppstillingsplass for bil pr. 100 m2 golvflate industribygg/kontorbygg, og 1 oppstillingsplass pr. 200 m2 lagerareal.
Prisar (april 2023)
- Opparbeidd planert areal, med veg, vatn, avløp og straum fram til tomtegrensa, eller innan rimeleg avstand til denne. Takst: kr 500/m2.
- Grenseline til sjø. Opparbeidd planert areal, med veg, vatn, avløp og straum fram til tomtegrensa, eller innan rimeleg avstand til denne. Takst: kr 700/m2.
- Ikkje opparbeidde areal (råtomt). Takst: kr 100/m2.
- Grenseline til sjø. Ikkje opparbeidde areal (råtomt). Takst: kr 150/m2
Nikøy næringspark
På Bulandet blir det etablert ein næringspark om lag 11 dekar. Fyrste byggetrinn er ferdig og det skal fyllast på med masse for å ferdigstille industriområdet.
Næringsparken på Nikøy ligg svært sentralt i øysamfunnet på Bulandet og har ei aktiv fiskehamn med fiskemottak, butikk, gjestebrygge, Havsalaten kjøkken & bar og snart ein ny fleirbrukshall med symjebasseng. I tillegg er det etablert eit nytt bustadfelt på Bulandet.
Andre næringstomter
Askvoll kommune har i arealdelen av kommuneplanen sett av areal for næring fleire stadar. Bygg- og eigedomsavdelinga har ansvaret for dei kommunale arealplanane, og du kan ta kontakt med avdelinga dersom du ønskjer nærare informasjon.
Askvoll kommune ønskjer å stimulere til nyetableringar og derfor er kommunale næringstomter bestemt etter sjølvkostprinsippet. Det vil seie at prisane berre skal dekke dei faktiske kostnadane ved å opparbeide feltet. Dei kommunale næringstomtane i Askvoll er svært rimelige samanlikna med mange andre.
Kontaktinformasjon
Ta kontakt med Askvoll kommune om du har spørsmål til næringstomtene eller ønskjer ein uforpliktande visning.